ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានសង្កត់ធ្ងន់ថា ដរាបណាសម្តេចនៅជានាយករដ្ឋមន្រ្តី នោះមិនមានការអនុញ្ញាតឱ្យដាំកញ្ឆានៅកម្ពុជានោះឡើយ។

សម្តេចធិបតីថ្លែងដូចនេះ ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅឆ្នាំ២០២៤ របស់អាជ្ញាធរជាតិប្រយុទ្ធប្រឆាំងគ្រឿងញៀន និងផ្សព្វផ្សាយផែនការ យុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៩ នារសៀលថ្ងៃទី ២០ ខែកុម្ភៈ ឆ្នាំ២០២៤។

សម្តេចធិបតីលើកឡើងថា មានវិនិយោគិនចង់សុំច្បាប់វិនិយោគដាំកញ្ឆានៅកម្ពុជា ក្រោមហេតុផលថាបម្រើឱ្យវិស័យសុខាភិបាល ខណៈប្រទេសផ្សេងបានអនុញ្ញាតឱ្យមានការដាំដុះ ប៉ុន្តែនៅកម្ពុជាគឺសម្តេចមិនអនុញ្ញាតនោះទេ។

សម្តេចធិបតីមានប្រសាសន៍ថា៖ «សម្រាប់ខ្ញុំ ដរាបណា ហ៊ុន ម៉ាណែត នៅជានាយករដ្ឋមន្រ្តី ច្បាប់នេះ (ដាំកញ្ឆា) ខ្ញុំអត់ឯកភាពនោះទេ»។

ទន្ទឹមនោះ សម្តេចក៏បានផ្តាំទៅដល់វិនិយោគិនបរទេស ដែលមានបំណងចង់មកសុំដាក់ទុនវិនិយោគដាំកញ្ឆានៅកម្ពុជា មិនចាំបាច់ចំណាយពេលធ្វើដំណើរមកកម្ពុជានោះទេ ព្រោះដាច់ខាតគឺមិនអនុញ្ញាតឡើយ៕